In de rubriek “Hier kom ik weg” van het Dagblad van het Noorden stond Hedy Smit-Wigchers centraal. Deze wekelijkse rubriek wordt in samenwerking met het Huus van de Toal gepubliceerd. Benieuwd naar het originele artikel? Deze kun je hier lezen: ©DVHN 2020.

Hier kom ik weg: ‘Het bedrief is een kloppend hart en daor biw allemaol dienstbaor an’

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Hedy Smit-Wigchers (47) oet Schoonoord is samen met breur Jaap en neef Aaldert Kuipers directeur van Wigchers Internationaal Transport. Ze zit ok in het bestuur van de Cure Adoa Foundation. Ze hef zölf de oogziekte Adoa en zöt daordeur slecht.

Ze had geern heur vrachtwagenriebewies haald, maor as op heur 16e wordt ontdekt dat ze maor vieftig procent zöt, wet Hedy Smit-Wigchers dat dat niet giet. ,,Dat hef indruk maakt. Maor ik was wal bliede da’k nog mien gewone riebewies halen kun.” Ze lacht. ,,Het glas is altied halfvol.”

Smit-Wigchers (47) is letterlijk tussen de vrachtwagens geboren. ,,Mien pap en mam hadden toen nog gien hoes en woonden veur nood in olde directieketen bij het bedrief.” Het transportbedrief, – 115 jaor leden deur heur overgrootopa opricht – hef nou umdebij honderd metwarkers en tachtig vrachtwagens.

Een doctorandus en een blokkenliemer

Nao de IVA Driebergen Business School giet ze hen Northwood University Michigan en komp ze oeteindelijk as doctorandus bedriefskunde van de Nyenrode Business Universiteit. ,,Ik warkte bij ExxonMobil in Rotterdam toen ik hier op Schoonoord Richard Smit tegenkwam in de kroeg. Hij kwam van de lts en was blokkenliemer, metselaar dus. Een groot verschil, maor het klikte.”

Veur hum komp ze nao tien jaor terug op Schoonoord en in 2002 begunt ze bij heur olders op de administratie. In 2005 wordt zij en breur Jaap andielholder en drei jaor later nimt ze het bedrief over. Heur opleidingen en warkervaring komt heur as directeur goed van pas. ,,Maor ik mus ok nog veul leren. Met mèensen umgaon bijveurbeeld. De eerste jaoren leidde ik het bedrief zoas mien va, die een strenge baos was. Dat was ik neudig um mij staonde te holden. Maor het paste niet bij mij.”

Riege vrachtwagens

Tegenwoordig giet het aans, gien top-downcultuur meer, zoas dat het. Smit-Wigchers vindt het belangriek um meer te praoten met de metwarkers. ,,In het begun van de coronatied heb ik ze ien veur ien beld. Ik wol weten hoe het met ze gung en ze vertellen dat ze zuch over heur wark gien zörgen maken mussen. Dat hebt ze slim waardeerd.”

Continuïteit holden in het bedrief is veur Smit-Wigchers het belangriekste. ,,Daorveur hej goede mèensen en goed materieel neudig. Alles mut in het tieken staon van de veuroetgang en niet van oes, de aandielholders. Het bedrief is een kloppend hart en daor biw allemaol dienstbaor an. A’k hier mangs met mooi weer de dam op ried en der stiet een riege vrachtwagens te glimmen, bin ik trots.”

Zegeningen tellen

Sinds november is ze penningmeester van de Cure Adoa Foundation. Adoa is een zeldzame arfelijke oogziekte, waorbij de oogzenuw ofstarft. Umdebei viefhonderd mèensen in Nederland hebt het. Zij ok, net as heur pap en oldste dochter. ,,Met de stichting wil wij meer bekendheid geven an Adoa en geld binnenhalen veur underzuken.”

Smit-Wigchers zöt nog 35 procent. ,,Tot veurig jaor was ik der nooit zo drok met. Nou ik weet dat het aal slimmer wordt, tel mien zegeningen. Maor mien 19-jaorige dochter zöt nog maor 30 procent. Ik wil derveur zörgen dat zij over vieftien jaor ok nog zien kan. Dát is mien driefveer.”